Сцена п’ята
Иван Франко
Любовь
Ах витай, монархинь, витай церкви нова,
Витай облюбленицо вѣрная Христова!
Литуй над облюбенца своего ранами,
Литуй ораз над нами, онаго цнотами.
А то видиш, якіе незносные раны
На пречистое тѣло его суть заданы!
Видиш, як есть сромотне не крест подвыженный,
А на виліот острыми гвоздми прободенный!
Видиш, як срокгим кубком есть участвованый,
Который му от отца был з неба зесланый!
Що все облюбеницо, рачил он подняти,
Абы тя, нову церковь, могл избудовати.
Живот свой тобѣ отдал, сам рачил умрѣти,
Абы тылко ти, церкви, могла вѣчне жити.
Положилися на землю, дал ся поконати,
Бысь як фундаментѣ могла на нѣм стати.
Литуй теды, о церкви, над его ранами,
Литуй, ораз над нами, онаго цнотами!
Я-м любов, ов надѣя, ов засе и вѣра,
Цноты есмо значные, леч выгнаны з мира.
Синикгокга абовѣм так ся роспалала,
Же и бога забила, и нас отогнала.
Претож ся юж до тебе дзѣся утекаем,
До тебе переходим, тобѣ ся отдаем.
Пригорни нас до себе, почни з нами жити,
Знай, же ти завше будем упрейме служити.
Припомни Авраама и Давида кроля,
Возми собѣ на память Моисея и Ноя:
Уваж, як они богу кохаными были,
А в томъ нѣхто, тылко мы им, цноты, служили.
И синакгокга поты в ласце зоставала,
Поки вѣру, надѣю и любов ховала.
И ты теды, о церкви, хотѣй нас приняти,
Хочеш ли вѣчне з богом в небѣ кролевати.
Сам Христос, коли новый тестамент будует,
Тобѣ тым тестаментом всѣх нас трох лекгует.
Любов естем, а прето тобѣ мя злецает,
Же ничто по всѣх добрах, хто любви не мает.
Пригорни ж мя до себе, дай ми в себе жити,
Вѣрне тобѣ, о церкви, шлюбую служити.
Вѣра
Церкви, рач теж приняти и мене другую,
И я тобѣ служити вѣрне обецую.
Вѣра естем, от пана той привилей маю,
Же и горы на мѣсце з мѣсца преставляю.
Сам бовѣм пан обецал, кгды чого хто прагнет,
Hex вѣрует, по вѣрѣ все ся ему станет,
Прийми теды и мене, нех живу с тобою!
З миру естем выгнана – литуй надо мною!
Надѣя
Розумѣю, же мене захочеш приняти,
Бо ся схочеш кролевства в небѣ сподѣвати.
Кгдыж дармо без надѣи и люде неба прагнут:
Десперати кролевства нѣкгды не осягнут.
Нехай в бога хто вѣрит, нехай его любит,
Леч еще без надѣи душу свою згубит.
Тобѣ теды належит, котраясь от пана
На вѣчное кролество дзѣся обебрана,
Абысь вѣру, надѣю и любов приняла,
И оные статечне по всяк час ховала.
Прийми, церкво святая, кгдыж есть тая воля
Облюбленца твоего, небеснаго кроля,
Котрый умерл для тебе, бысь ты вѣчне жила,
Вѣру, надѣю, любов завше к нему мѣла.
Церков
О нещасливый видок, видок оплаканый!
О тяжкий раз и нѣкгды в свѣтѣ неслыханый!
Синакгокго, а що то, що то учинилась,
О, тиранско розуму, як вижу, позбылась.
Бога, который тебе над усѣ народы
Любил и от вшелякой боронил пригоды,
Бога, который, праве заордовал вшехмоцность.
Выславуючи твою чудами велможность,
Бога, который рѣкам казал уставати
Або морю для тебе впол ся роздѣляти,
Который небу для тебе казал хлѣб родити
И каменям вас в пущи водою пойти –
Тогось тераз, нестейтыж, так зесромотила,
Нага, ранна, на крестѣ ганебне забила!
Церквою тя названо, о нендзная цорко,
Синакгокго невдячна, щирая ящорко!
Кгды тя так милосердям бог обогащает,
Же як бы ве внутрностях самых тя ховает, –
Ты, нестейтеж, внутрности его прогружаеш
И власного ганебне отца забиваєш.
И овые вжды цноты що ти провинили?
Если ж тые не вѣрне по всяк час служили?
Любов, вѣра, надѣя так тя выславляла,
Же вскорѣ в звитязтвах есь весь свѣт превыжшала,
А ты тераз, безбожна, литости не маеш,
Сромотне их от себе ото выганяеш.
Я теды юж, о цноты, над вами литую,
И як мати власная до серца приймую.
З вами живу по всяк час и з вами вмираю
Вас аж до страшнаго дня вцале доховаю.
Любо то вас выгнано, леч в моем мешканю
Не так жити будете, яко на выгнаню.
И вам в самых внутрностях мѣсце позваляю,
Серце, розум и волю вам в моц полецаю.
Не я вами, вы мною, о цноты, владѣте,
Всѣми чувствы моими, всем тѣлом радѣте!
А ты, Христе, мой пане, на крестѣ распятый,
Жесь мя смертю своею рачил збудовати,
Претож низко колѣна свои прекланяю
Страсти твои святыи от днесь величаю.
Укрижованый пане, добрый есь заисте,
Добротливый пред смертю и при смерти, Христе!
Здавна ты милосердя к человѣку маєш,
Которое при смерти ему освѣдчаеш.
Люб албовѣм и руки звязаные маєш,
Еднак спасеніе наше ими содѣваеш..
Кгды на хрестѣ юж раны у слупа относиш,
Бремя еднак на оном грѣховное носиш.
Кгды юж от слины лица твоего не знати,
Рачиш ним еднак наша сердца освѣшчати.
Укрижованый пане, добрый есь заисте,
Щодробливый пред смертю и при смерти, Христе!
Смерть твоя, Христе, моим есть повстаніем, знаєш,
Бо мя в той час будуєш, коли умираєш.
Тебе на крест, Христе мой, юж-юж распинают,
А мои ся на той час стѣны росширают.
Тебе з креста на землю мертвого здеймуют,
А мои ся на той час стѣны подеймуют.
Тебе плащеницею чистою ввивают,
И каменем во гробѣ нага закривают,
А я, церков, юж зовсѣм бывши збудована,
Отом вышла на видок, позорне убрана.
Укрижованый пане, добрый есь заисте,
Щодробливый пред смертю и при смерти, Христе!
За що я тебе тераз благодару, пане,
И буду благодарить, поки мене стане.
В пѣснех моих буду тя завше выславляти,
Страстей твоим пречестным буду ся кланяти.
Слез для твоей смерти нѣкгды не вгамую
I всѣ народы ними годно участую.
Згромаджу всѣ краины ко кресту твоему,
Поклонимся вси тебѣ, господу своему.
Вѣру, надѣю, любов тобѣ доховаю,
Котрій дзѣсь от тебе повѣрены маю.
Выпилесь за нас келих ганебнои муки,
Претож его от дзѣся взявши, пане, в руки
Буду завше в покорѣ любезной носити
И оным всѣ народы вѣчные поити.
Вспанялыи олтарѣ для него выставлю,
И докола ереов у него поставлю.
Крест твой в вѣрѣ, надѣй, любови буду мѣти,
Который за себе то будут носити.
Так буду добродѣйства твои завдячати,
Котрыись мнѣ, церквѣ, рачил показати.
А ты, пане мой, боже, рач милостив быти,
И в притомныи часы рач мя боронити!
Ты естесь пан от вѣка щодробливыи, гойный,
Отдали ж от нас плакги, повѣтря, глад, войны!
Укрижованый пане, добрый есь заисте,
Щодробливый пред смертю и по смерти, Христе!
Примітки
Подається за виданням: Франко І.Я. Зібрання творів у 50-и томах. – К.: Наукова думка, 1980 р., т. 28, с. 346 – 350.